ኣብ መንጎ ሓይልታት ኤርትራን ትግራይን ውግእ ከምዝተኻየደ መራሕቲ ትግራይ ገሊጾም

ፍልፍል፡ BBC ትግርኛ

ሰራዊት ኤርትራ ኣብ ልዕሊ ሓይልታት ትግራይ መጥቃዕቲ ከምዝፈጸመ ሓደ ካብ ላዕለዎት መራሕቲ ህወሓት ከሲሱ።

ኣባል መሪሕነት ህወሓት ኣቶ ጌታቸው ረዳ ኣብ ትዊተር ኣብ ዝዘርግሖ ሓበሬታ፡ ገለ ኣሃዱታት ሰራዊት ኤርትራ ብ24 ግንቦት ኣብ ከባቢ ዓዲ-ኣውዓላ መጥቃዕቲ ከምዝፈጸመን ብሓይልታቶም ከምዝበርዓነን ጠቒሱ።

ብወገን ኤርትራ ብዛዕባ’ዚ ኣቶ ጌታቸው ዝጠቐሶ ረጽሚ ዝተዋህበ መግለጺ’ኳ እንተዘየለ፡ ኣብዚ ቀረባ እዋን ግን ህወሓት ንዳግማይ ኲናት ወተሃደራዊ ምድላዋት ይገብር ከምዘሎ ሰብመዚ ኤርትራ ገሊፆም ነይሮም’ዮም።

ኣፈኛ መንግስቲ ኢትዮጵያ ዶ/ር ለገሱ ቱሉ ብወገኑ ንቢቢ ኣብ ዝሃቦ ቃል፡ ብዛዕባ’ቲ ዝተባህለ ናይ ኤርትራ መጥቃዕቲ ሓበሬታ ከምዘይብሉ ብምግላጽ፡ “ሰራዊት ኤርትራ ግና መጥቃዕቲ ክፍጽም ኣይክእልን” ኢሉ።

መራሕቲ ህወሓት “ባዕሎም ንኲናት ይዳለዉ ስለዘለዉ፡ ንማሕበረሰብ ዓለም ንምድንጋር ዝፈጠርዎ” እዩ ብምባል ድማ ንመግለጺ ኣቶ ጌታቸው ነጺግዎ።

“ኣብ ከባቢ ዓዲ-ኣውዓላ ሓይልታትና ኣብ ዘካየድዎ ዕዉት ጸረ-መጥቃዕቲ” ዝበለ ኣቶ ጌታቸው ኣዛዚ ብርጌድ ዝርከቦም ልዕሊ 300 ዝኾኑ ወተሃደራት ኤርትራ ከምዝተቐትሉን ከምዝቖሰሉን ጠቒሱ።

ብሰንኪ ኣብ ክልል ትግራይ ዘሎ ምቁራጽ መራኸቢታት፡ እቲ ቁጽሪ ይኹን እቲ ኩነታት ብናጻ ኣካል ኣይተረጋገጸን።

ብዙሕ ብረት ከምዝማረኹ ዝገለጸ ኣቶ ጌታቸው፡ ሓይልታት ኤርትራ ኣብ ዝሓለፉ ክልተ መዓልታት ኣብ ከባቢ ሸራሮ ደብዳባት ከምዝፈጸሙ ከሲሱ’ሎ።

ሰራዊ ኤርትራ ኣብ ከባቢ ባድመ፡ ፍሉይ ቦታ ዓዲ ሓረት ደብዳባትን መጥቃትን ከምዝገበረ’ውን ሓደ ስሙ ክጥቀስ ዘይደለየ ላዕለዋይ ኣዛዚ ሓይልታት ትግራይ ንቢቢሲ ገሊጹ።

“ስርዓት [ኢሳይያስ] ነቲ ዞባ ኣብ ዘየቋርጽ ግጭት ንምእታውን፡ ሰላም ንምምጻእ ዝካየድ ዘሎ ሓቀኛን ትምኒታውን ሰላም ንምዕንቃፍ ዘይገብሮ ከምዘየለ ዘነጽር’ዩ” ክብል ኣቶ ጌታቸው ኣብ ትዊተር ጽሒፉ።

ወሲኹ ድማ “እቲ ስርዓት ነቲ ሒዙዎ ዘሎ ኣካይዳ ክቕይር ማሕበረሰብ ዓለም ኣብ ልዕሊኡ ጸቕጢ ክገብር ሓለፍነቱ ምዃኑን፡ እቲ ስርዓት ንጸበባ ህዝብና ከናውሕ ትም ኢልና ክንርእዮ ፍቓደኛት ዘይምዃና ደጊምና ነረጋገጽ” ኢሉ።

መራሕቲ ኤርትራ ብወገኖም፡ ህወሓት ነቲ ኣብ መንጎ ኤርትራን ኢትዮጵያን ዘሎ እናተመሓየሸ ዝመጸ ዝምድና ንምዕንቃፍ ይኹን፡ ኣብቲ ዞባ ዘይምርግጋእ ንምፍጣር ከምዝሰርሑ’ዮም ክኸሱ ጸኒሐም።

ኤርትራ ኣብቲ ንኣስታት ክልተ ዓመታት ዝቐጸለ ኲናት ትግራይ ብምእታው ሓይልታታ ኣብ ጎኒ ሰራዊት ኢትዮጵያ ብምስላፍ ኣንጻር ሓይልታት ትግራይ ከምዝተዋግአት ይፍለጥ። ሓይልታት ኤርትራ ኣብ ትግራይ ቅትለትን ጾታዊ ዓመጽን ዝርከቦ ከቢድ ምግሃስ ሰባዊ መሰላት ከምዝፈጸሙ ተሓለቕቲ መሰላት ይኸሱ። ብሰንኪ’ዚ ካብ ኣመሪካን ሕብረት ኣውሮጳን ሓደስቲ እገዳታት ተነቢሩላ ኣሎ። ኤርትራ ግን ነቲ ክስታት ትነጽጎ።

ኩሎም ወገናት ናይቲ ኲናት ጃምላዊ ቅትለት፡ ጾታዊ ዓመጽን ዝርከቦ ግፍዕታት ከምዝፈጸሙ ትካላት ተሓለቕቲ መሰላት ይኸሱ።

ኣብዚ ቀረባ እዋናት ብወገን ኤርትራ፡ መንግስቲ ኢትዮጵያን መራሕቲ ትግራይን ክወሃብ ዝጸንሐ መግለጺታት፡ ዳግማይ ውግእ ከይውላዕ ስግኣታት ፈጢሩ ጸኒሑ’ዩ።

ብወገን መንግስቲ ኢትዮጵያን ህወሓት ዝተወስደ ሰብኣዊ ምቁራጽ ተጻብኦታት፡ ተዛማዲ ህድኣት ፈጢሩ ምጽንሑ ይፍለጥ።

እንተኾነ ግን፡ ሰብኣዊ ረዲኤት ብዘይገለ ጸገምን ብስሩዕን ናብታ ኣብ ዕጽዋ እትርከብ ክልል ትግራይ ክኣቱ እንተዘይኪሉ፡ ነቲ ዕጽዋ ንምኽፋት ወተሃደራዊ ስጉምቲ ከምዝወስዱ መራሕቲ ትግራይ ከጠንቅቑ ጸኒሐም’ዮም።

ካብ ክልላት ዓፋርን ኣምሓራን ዝሰፍሐ ኲናት ትግራይ ኣብ ሰሜን ኢትዮጵያ ሰፊሕ ምፍንቓል ዝርከቦ ሰብኣዊ ቅልውላዉ ምስዓቡ ይፍለጥ።