ኤርትራ ሓይልታታ ካብ ትግራይ ከተውጽእ ኤምባሲ ኣመሪካ ኣብ ኣስመራ ጸዊኡ

ፍልፍል፡ BBC ትግርኛ

ኤርትራ፡ ኣብ ሰሜን ኢትዮጵያ እትገብሮ ዘላ ኣብ ዞባ ቀርኒ ኣፍሪቃ ዘይምርግጋእ ዝፈጥር ወተሃደራዊ ምትእትታው ደው ከተብሎ ኣመሪካ ጸዊዓ።

ኤምባሲ ኣመሪካ ትማሊ ኣብ ፌስቡክ ኣብ ዘውጽኦ መግለጺ፡ ሚኒስተር ዜና ኤርትራ ኣቶ የማነ ገብረመስቀል ዘይቅኑዕ ሓበሬታ ይዝርግሕ ኣሎ ክብል’ውን ነቒፉ።

እቲ መግለጺ፡ ሚኒስተር የማነ፡ ቅድሚ ሓደ ሰሙን ኣብ ትዊተር ኣብ ዝሃቦ ርእይቶ ነታ ብስም ዘይጠቐሳ ዳይረክተር ትካል ዓለምለኻዊ ልምዓት ኣመሪካ (ዩ-ኤስ-ኤ-ኣይ-ዲ) ብዛዕባ ኤርትራ ስኑዕ ሓበሬታ ትዝርግሕ ኣላ ኢሉ ድሕሪ ምኽሳሱ’ዩ እቲ ኤምባሲ ግብረመልሲ ሂቡሉ ዘሎ።

እቲ ሚኒስተር “ዳይረክተር ዩ-ኤስ-ኤ-ኣይ-ዲ ክትገልጾ ዝኸብድ ግጉይ ሓበሬታ ናይ ምዝርጋሕ ክእለት ኣለዋ” ክብል ብ29 ሚያዝያ ጽሒፉ ነይሩ። ምንጪ ዝተጠቕመትሉ ሓበሬታ ‘ኒው ሁዩማኒታርያን’ ዝተባህለ መርበብ ሓበሬታ ምዃኑ’ዩ እቲ ሚኒስተር ዝጠቅስ።

እቲ ኤምባሲ ብወገኑ፡ “ሚኒስተር የማነ ገብረመስቀል ዘይቅኑዕ ሓበሬታ ይዝርግሕ ኣሎ” ክብል ግብረመልሲ ብምሃብ፡ “ሓይልታት ኤርትራ ጾታዊ ዓመጽን ቅትለት ቆልዑን ዝርከቦ ኣሰቃቒ ምግሃስ ሰባዊ መሰላት ከምዝፈጸሙ ኣኽባር ሕጊ ኢትዮጵያ፡ ኮሚሽን ሰባዊ መሰላት ኢትዮጵያን ሕቡራት ሃገራትን ሰኒዶሞ’ዮም” ክብል ወቒሱ።

ኤርትራ ነቲ ሓይልታታ ኣብ ትግራይ ፈጺሞም ዝብሃል ግፍዕታትን ምግሃስ መሰላትን ክትነጽጎ ምጽንሓ ይፍለጥ።

መንግስቲ ኤርትራ፡ ሓይልታቱ ካብ ትግራይ ከውጽእን፡ ነቶም ግፍዕታት ዝፈጸሙ ብሓላፍነት ክሓቶምን ኤምባሲ ኣመሪካ ጸዊዑ።

ሓይልታት ኤርትራ ካብ ትግራይ ጠቕሊሎም ክወጹ ምዃኖ ምሰበስልጣን መንግስቲ ኢትዮጵያን ኤርትራን ኣብ ዝሓለፈ ዓመት ገሊጾም ምንባሮም ይዝከር።

ኣብ መንጎ እቲ ሚኒስተርን ኣብ ርእሰከተማ ኣስመራ ዝርከብ ኤምባሲ ኣመሪካን ዝግበር ናይ ቃላት ዳርባን ምጉት እዚ ናይ መጀመርታ ኣይኮነን።

ብፍላይ፡ እቲ ኤምባሲ ኣብዚ ቀረባ ዓመታት ብዓውታ ኣንጻር መግለጺታት ሚኒስትሪ ዜና ኤርትራ ዝህቦም ግብረመልሲ ኣብ ማሕበራዊ መራኸቢታት ኣቓልቦ ብዙሓት ኤርትራውያን ዝሰሓበ’ዩ።

እቲ ኤምባሲ: ብሰሉስ’ውን: ብምኽንያት ዓለማዊ መዓልቲ ፕረስ ነቶም ኣብ መስከረም 2001 ተኣሲሮም ዝተሰወሩ ኤርትራውያን ጋዜጠኛታት ብምጥቃስ “ኣብ ዓለማዊ መዓልቲ ዓው ኢልና ስሞም ብምጽዋዕ ከምዘይተረስዑ ክንነግሮም ኣሎና” ክብል ኣብ ፌስቡክ ጽሒፉ ነይሩ።

ኣብቲ ዝጸሓፎ ዝርዝር፡ “ዳዊት ኢሳቕ፡ ስዩም ጸሃየ፡ ዳዊት ሃብተሚካኤል፡ ማቴዎስ ሃብተኣብ፡ ፍስሃየ ዮውሃንስ (ጆሽዋ)፡ ኣማኑኤል ኣስራት፡ ተመስገን ገብረየሱስ፡ ስዒድ ዓብደልቃደር፡ ዮሱፍ ሙሓመድ ዓሊ፡ መድሃኔ ሃይለ፡ ኣብ ዓለማዊ መዓልቲ ናጽነት ፕረስ ስሞም ከም ዘይተረስዐ ንኸነፍልጦም ዓው ኢልና ክንዛረብ ኣሎና” ብምባል መንግስቲ ኤርትራ ንኽፈትሖም ጸዊዑ።